Letgoulal Mate
Bachelor of Divinity (BD)
Text: Haggai 1:1-15 & Ezra 1-4 Key verse: Haggai:1:4
520 BC vel chun Israelte Kum 70 jen Babylon a asoh channa uva konin Persia lengpa Cyrus thusah in agamsungu ahung kile tauvin ahi (Ezra 1). Hiche pet a amahon agelkhoh masat pen uchu Pathen Houin sahphat ding chu ana hi. Hiti chun gunchutah le thanom tah in Houin sah ana pan uvin ahile jetle vei sah le lhanga kona doudalna (melma, thasetna le lunglhahdaina) jat chom2 ho jeh chun Houin sah chu ana hai tauvin ahi (Ezra 4). Pathen Houn sah sangin amaho inn chen le natoh ding loubol ding joh ana khohsah jo tauvin Pathen Houin chu abulpi (foundation) bou akijamin don louvin ana koi tauvin ahi (Ezra 3). Hiche phat laiya hi Houin sah banjop kit na ding thusei dinga Haggai themgao hi Pathenin ana sol ahi. Tun hiche thilsoh hi kum 2000 masang peh hita jongle eiho dinmun toh akikhel na behseh aumpon phatvet banga kivetna thei hidingin tahsan aumin hiche ho chu anoiyah hin ana veu hite.
- Athupipen gelkhohna dia kouna (verse 4)
“Vo kamite idia nangho in phatah tah a chenga, kei Houin asesa kijam ham?”
Ibol a Pathenin hiche thucheng a hi amite ana phosal ham atile Israel te chun chenna thei mei2 in akisah pouvin in nom tah2 (luxurious house) akisah uva Pathen Houin asesa kijam chu sahphat ding agel khoh lou jeh uva ana phosal u ahi. Pathenin Haggai themgao kamma asei doh nom hi Houin jong chu hinante amavang amite lungchang Pathen ngaisahna alhahsamnau chu aseidoh nom hinte ti ginchat aume. Ajeh chu alungthim uva Pathen gelkhohna nei uvin lang hile Houin hi asesa akijam sah louhel diu ahi ti mudoh thei ahi.
Application: Tunia eiho TCC Houin jong Jerusalem Houin kisei banga foundation kipan doh ahitan sum le pai lhahsam jeh in aban akichal but tapon ahi. Tunin Pathenin Haggai themgao kamchenga asei banga eiho jong in nom tah2 a ichen uva loulho thingpoh chule eima in chen bou ikikhohsah a Pathen houin hitia hi akhom bou kitungdoh khu imoh vet diu hitam? Tunikho in jong pathenin chunga Israelte thudoh adoh khu eiho jong eidong cheh uve tin gel utin inopsah na luggel pailhan Houin sah phatna dingin pan la uhite tin iki tem uve.
- Ichung uva thilsohho kikhol/vepha kit dia kouna (verse 5-7)
“Nachung uva thilsoh mulou nahiuvem?”……..
Israel te chu kichol louhel in akisa boiyun amavang Pathen Houin donlouva akoi jeh un atoh gao chungah lung lhaina le kipana anei thei pouve. Muchi tampi2 atu vangun lhosohga themcha bou amu uvin, neh ding anei vangun oivana khamin anei pouvin, lengpitwi don ding aneiyun chimnan anei pouve na atong2 jengun hinlah oivanan anei pouve. Chu tobanga agenthei nau jouse hi thildang jeh ahipon Pathenin akounau ahibouve.
Application: Pathen kouna ingai lou teng ule ipi bol jong leu hen kipana le lungna chimna inei lou diu ahi ti Israelte umchan a kon mudoh thei ahi. Sum le pai tam pitah kinei hen Jeep le car hoi tah2 tampitah kinei jongle Pathen apan lou tengle kana le lhiso na ding bep ahi. Hijeh chun tunia ipi hi iha boipi pen em? ahiloule ikhohsah pen em? ikhohsah igel khoh lah a chu Pathen Houin sahphat ding hi jao hinam ti kikhol cheh din ikitem uve achuti loule Pathenin Verse 9 a “Kamut mangpeh jitai” ati banga ahomkeo seh imu diu ahi.
- Ibol thei ipan theina cheh a pang dia kouna (verse 8-15)
“Tun thinglhang lama kaltouvun, ithil gajongun Houin saphauvin;……
Pathenin in kicheh selin thinglhang lama kal touva inthil gajong dingin amite chu tepna aneiyin hibang chun Pakai sole Haggai thusei chu anagaiyun Zerubbbabel le Joshua chule mipin Pakai a-Pathen un boldia aseipeh u chu aboltauve. Hijeh chun Pathen achung uva alung lhai tan “Kaum pi jing ding nahiuve ati”(verse13)
Application: Pathenin Israel te thinglhang lama kaltouva inthil jong dia aseipeh bangin tunin nangle kei jong ipau Pathenin alen aneo ateh akhang eikou cheh uve, achutile nang le na insungmite tunia Houin saphat kitna dinga ipia napan tah em? Pathenin itouna muna kona kipandoh ta dingin eitem cheh uve. Ibola “thinglhang” kiti thucheng hi aman chah ham itile Pathen natoh hi thilbai ahipoi ti avetsah hidingin ginchat aume. Amavang ilungneo lou na diu chu verse 13 a Israelte henga “kaumpi jing ding na hiuve” tia sei Pathen khu eiho Pathen jong ahin ikipat doh phot2 ule aman eilhon pi jing diu ahi ti sumil pou hite.
Thukhumkhana (conclusion)
Houin sahphat kiti hi cement, concrete, chule neldi ho keoseh ahipon eiho dinga Pathen lenggam na itohna thei diu lampi/kot lentah Pathenin eihon peh u ahi. Tunin Pathenin khat cheh hi thudoh einei cheh uve tin gel leuhen vetsahnan Nagel khoh pen chu keima Houin sahphat ding hinam? Ole nangma housatna ding in nomtah a chenna ding bou nagelkhoh nalai em? Tunia nakisah boi naho chun kipana le lung lhaina napeh hinam? A houin sahna dia ipia pan nalah hitam? Ahiloule ipia pan la dia nakigel tam? Hijeh chun achaina keiyin Haggai khanglai mite banga kithoudoh a Pathen koma “Pakai keima kichoi atna ding hilouvin nangma loupina dingin na Houin sahphat na dingin pan la tange” tia kipan doh thei ta dingin Pathenin athu ibon chao chung phatthei boh tahen. Amen